As escolas de arte Allegro.T
Escola de Escrita
Escola de Danza e Teatro
Escola de Artes Plásticas
Escola de Escrita
(Os Tilos)
Club de lectura
Espazo no que gozaremos do pracer da lectura compartida, ademais de intercambiar impresións sobre un texto ou obra literaria. Se unicamente che apetece participar como oínte, este tamén é o teu recuncho lector.
Periodicidade
Unha sesión mensual (mércores ás 20:30 h).
Duración
1 hora.
Idade
De 16 anos en diante.
Curso de escrita creativa
Unha actividade para ampliar horizontes potenciando a túa creatividade, aprendendo técnicas e habilidades narrativas, e descubrindo o teu estilo literario. Todo isto a través de lecturas, xogos e exercicios compartidos con persoas coas túas mesmas inquedanzas.
Periodicidade
Cada venres en horario de tarde.
Duración
1 hora.
Idade
Para a rapazada entre 10 e 14 anos. Para persoas adultas de 16 anos en diante.
Tertulias literarias
Un punto de encontro con autoras e autores que nos falarán do proceso creativo e outros detalles de interese sobre as súas obras máis recentes.
Periodicidade
Trimestral.
Duración
1 hora.
Xornalista e escritora
Claudia Castro
Nacida no barrio compostelán de O Castiñeiriño e residente no lugar de Penelas (Teo), é licenciada en Xornalismo e Filoloxía Inglesa pola USC e diplomada en Socioloxía pola UNED. Profesionalmente dedícase á comunicación dende 1995. Boa parte do seu tempo transcorre en Corme, na Costa da Morte.
Recoñecementos literarios: Premio Duck Fin de poesía (2003), I Certame de Microrrelatos da Lonxa Literaria de Moaña (2003), V Concurso de e-poemas do diario La Vanguardia (2005), Premio de Poesía María Mariño (2017), Premio de Poesía Xosé Manuel López Ardeiro (2017).
Obras: Adagio para unha viaxe silente (Ed. Follas Novas), Ser, corazón e boca (Ed. Medulia), Galicia, o país das marabillas (Ed. Galaxia), Amiga lúa, amigo mar. Moon, me & the sea (Ed. Galaxia), así como diversos libros colectivos.
O compositor Fernando Vázquez Arias púxolle música a catro poemas seus: Amor é mar, Corme, Camiño dos faros e Azul.
Claudia Castro é o nome literario de Mercedes González.
Escola de Danza e Teatro
(Os Tilos)
Danza creativa e expresión corporal
Unha actividade na que aprenderemos a desenvolver as capacidades creativas do noso corpo, conectalo coa imaxinación e gañar consciencia do que estamos a comunicar cando nos movemos. Todo isto a partir de técnicas de danza e teatro e xogos amenos.
Periodicidade
Unha sesión semanal.
Duración
1 hora.
Grupos de idade
De 3 a 5 anos; de 6 a 9; de 10 a 13; de 14 a 18; máis de 18.
Teatro
Nesta actividade aprenderemos distintas técnicas teatrais para desenvolver a nosa creatividade e superar o medo a expoñernos diante dun público. Tamén descubriremos un xeito novo de comunicarnos mediante os nosos corpos e as nosas voces.
Periodicidade
Unha sesión semanal.
Duración
1 hora.
Grupos de idade
De 6 a 9 anos; de 10 a 13; de 14 a 18; máis de 18.
Actriz e comunicadora audiovisual
Raquel Garabal
Comeza a súa formación na Universidade de Santiago de Compostela e o seu interese polas artes visuais e o cinema lévana a graduarse en Comunicación Audiovisual en 2017. Paralelamente, inicia os seus estudos teatrais na Escola de Artes Escénicas Pábulo en 2015, onde descobre outra das súas vocacións, a expresión corporal.
En 2016 iníciase no teatro de marionetas, traballando en proxectos coa compañía Títeres Cachirulo. Continúa o seu camiño no Institut del Teatre de Barcelona en 2018, no marco do itinerario de interpretación físico e visual, acabando por graduarse na especialización de Teatro Físico en 2023.
Entre as disciplinas que exerce cómpre salientar a danza contemporánea, o mimo corporal, o teatro de obxectos, a acrobacia, o teatro de texto ou a rapsodia. Agora traballa como actriz nas compañías Nauta (Galicia), Criatura Teatre (Valencia-Galicia) e La Metralla (Cataluña).
Escola de Artes Plásticas
(Os Tilos)
Artes plásticas para a cativada
Unha actividade para fomentar a creatividade e a imaxinación, así como para descubrir a historia da arte a través de xogos e actividades multidisciplinares.
Traballaremos as habilidades manuais, visuais, a coordinación e o equilibrio. Tamén crearemos esculturas, pinturas xigantes, autorretratos con animais, entre outras obras interesantes.
Realizaremos ademais exposicións para nais e pais, entre moitas outras cousas divertidas. Será unha grande aventura!
Periodicidade
Unha sesión semanal.
Duración
1 hora.
Artes plásticas para xente moza
Este curso será unha travesía a través do debuxo, a ilustración e os mundos visuais da xente nova. Aprenderemos a debuxar, a crear un storyboard, a deseñar personaxes e a pintar escenografías.
Descubriremos as bases e fundamentos do debuxo e da cor apoiándonos en debuxantes, ilustradoras/es e outras/os creadoras/es visuais que nos inspiren.
Tamén traballaremos conceptos do mundo do cómic, do manga, dos debuxos animados e das series, ademais de realizar vídeos para TikTok, pequenas animacións e debuxos e pinturas dixitais entre moitas outras actividades.
Periodicidade
Unha sesión semanal.
Duración
1 hora.
Artes plásticas para xente adulta
Este curso será unha viaxe a través do debuxo, da pintura e da historia da arte. Aprenderemos a debuxar dun xeito ameno e progresivo, realizando exercicios e prácticas diversas.
Tamén descubriremos as bases e fundamentos do debuxo e da pintura estudando as obras de arte clásicas, modernas e contemporáneas, e practicaremos distintas técnicas: carbón, acuarela, collage e fotografía, entre outras.
A medida que cada alumno avance, poderá escoller o tema que máis lle interese ir traballando de maneira individual, seguindo o seu propio rumbo.
Periodicidade
Unha sesión semanal.
Duración
1 hora.
Artista plástica e muralista
Raquel Germade
Compostelá de nacemento, e veciña de Teo dende hai cinco anos, realizou a súa formación en distintas universidades da Península e de América do Sur.
Licenciada en Belas Artes na Facultade de Belas Artes de Pontevedra, con especialización en muralismo na Facultad de Bellas Artes de Sevilla e deseño gráfico na Universidade Federal de Santa Catarina (Brasil). Completou a súa formación realizando un Posgrao en ilustración na Faculdade de Belas Artes da Universidade do Porto.
Artista plástica multidisciplinar, desenvolve o seu traballo mesturando elementos da pintura tradicional, da ilustración, da banda deseñada ou do muralismo.
A maior parte do seu traballo actual son obras e murais que realiza para organismos públicos, entidades privadas e festivais. Ademais, colabora coa Galería Dupla de Santiago de Compostela onde expón e vende a súa obra gráfica.
Raquel entende a arte como “un camiño, unha aventura cara a unha mesma. Un exercicio de liberdade total”.
